‘सलाह विश्वकप अघि नै ठिक हुने आशा’

Leaderboard Banner

कायरो (एजेन्सी)– इजिप्ट राष्ट्रिय फुटबल टोलीका प्रशिक्षक हेक्टर कुपरले मोहम्मद सलाह विश्व कप सुरु हुनु अघि फिट हुने आशा राखेका छन् । रियल म्याड्रिडसँग मे २६ मा भएको च्याम्पियन्स लिग फाइनलमा सर्जियो रामोससँग ठोक्किएर सलाह घाइते भएका थिए । उनको काँधमा चोट लागेको थियो ।

चोट लागेको केहि दिनमा इजिप्ट फुटबल संघले सलाह तीन साता भन्दा बढी मैदान बाहिर रहने बताएको थियो । यद्दपी उनलाई विश्व कपको २३ सदस्यीय टोलीमा समावेश गरेका थियो । ‘सलाह ठिक हुने क्रममा छन् ,’ कुपरले भने,‘ हामी अझै सुधारको अपेक्षमा छौं । चोटका कारण फिटनेस लेभलमा कमी आएको हुन सक्दछ ।’

उनले विश्व कप अघि नै सलाह फिट हुने अपेक्षा पनि गरे । ‘हाम्रा डक्टरले सुखद समाचार दिएका छन् । उनी उरुग्वे अघिको खेलमै हामीसँग हुने सम्भावना छ,’ उनले थपे,‘ हामी आशावादी र उनको प्रतिक्षामा छौं ।’ जुन १५ मा उरुग्वेसँग खेल्दै इजिप्टले यसपटकको विश्व कपको सुरुवात गर्नेछ ।

अहिले टोलीको तयारीमा कुनै असर नपरेको पनि प्रशिक्षक कुपरले बताए । ‘ हामीलाई खासै असर छैन । हामी पुरानै अवस्थामा छौं । हामी एक जना खेलाडीमा मात्र निर्भर छैनौं,’ प्रशिक्षकले भने,‘ सलाह हाम्रा महत्वपूर्ण खेलाडी हुन् । तर उनी समयमा फिट भएनन् भने पनि हामीसँग अरु खेलाडी छन् । ’

फुटबलमा चोट जो कोहिलाई पनि लाग्न सक्ने उल्लेख गर्दै प्रशिक्षकले भने,‘ फुटबल यहि हो । यो जो कोहिसँग पनि हुन सक्दछ । त्यसमा हामीले विकल्प राख्नुपर्दछ । तर, उनी फर्कनेमा हामी आशावादी छौं । ’ संघको फेसबुक पेजमा पनि सलाह चोटबाट ठिक हुने क्रममा रहेकाले उनी टोलीसँग हुने विश्वास व्यक्त गरिएको छ । समूह एमा रहेको इजिप्टले उरुग्वे पछि आयोजक रसिया र साउदी अरेबियाको सामना गर्नेछ ।

प्रकाशित : बुधबार, जेठ २३, २०७५१५:४४

आफ्नो मत ब्यक्त गर्नुहोस् :

अर्को समाचार:

विश्वलाईनै चकित पार्ने विश्व कप फुटबलका १० अप्रत्यासित नतिजाहरु !