सबै प्रदेशमा नमूना बहुप्राविधिक शिक्षालय

Leaderboard Banner

भक्तपुर, १३ फागुन ।  शिक्षा सचिव मधुप्रसाद रेग्मीले प्राविधिक शिक्षा तथा व्यावसायिक तालीम परिषद् (सिटिइभिटी)ले सीपयुक्त जनशक्ति निर्माणका लागि क्षमता विकास र रोजगारीलाई जोड दिनुपर्ने बताउनुभएको छ ।

सिटिइभीटीको ३० आैँ वार्षिकोत्सवमा उहाँले श्रम बजारमा सहजै बिक्न सक्ने र पूँजी निर्माणमा सहयोग गर्न सक्ने जनशक्ति उत्पादन गरी देशलाई समृद् बनाउन सिटिइभिटीको महत्वपूर्ण भूमिका रहनुपर्ने बताउनुभयो । “अब सिटिइभिटीले आवश्यकता पहिचान र म्यापिङ गरेर स्थानीय स्रोत, साधन र प्रविधि परिचालनमा जोड दिनुपर्छ”, उहाँले भन्नुभयो ।

कार्यक्रममा प्रा डा सुरेशराज शर्माले युवालाई सीप दक्षताको डिग्री दिइनुपर्नेमा जोड दिनुभयो । सिटिइभिटीका सदस्य सचिव पुष्परमण वाग्लेले सात वटै प्रदेशमा अधिकारसम्पन्न प्रादेशिक कार्यालय स्थापना गरी कम्तीमा एउटा नमूना प्राविधिक शिक्षालय स्थापना गर्ने तयारी भएको बताउनुभयो । उहाँले भन्नुभयो, “अब सात प्रदेशमा सात वटा मोडेल पोलिटेक्निक बनाउने नीति बजेटमा रहेको छ, सातै प्रदेशमा नयाँ संस्था बनाउनेभन्दा पनि भएकालाई छनोट गरी सुधार गरिनेछ, सीप दिनका लागि योजना निर्माणसहित शिक्षा मन्त्रालय, योजना आयोग र अर्थलगायत अरु मन्त्रालयसँग सिटिइभिटीको नेतृत्वले लबिङ शुरु गरिसकेको छ ।”

उहाँले प्राविधिक शिक्षा तथा व्यावसायिक तालीमका क्षेत्रमा कलम चलाउने केन्द्रका एक पत्रकार र सात प्रदेशबाट एक एक गरी आठ जनालाई वार्षिक रुपमा पुरस्कृत गरिने घोषणा गर्नुभयो ।

त्यस अवसरमा प्रशासन महाशाखा प्रमुख रमेश बखती, फोरम फर हेल्थ एण्ड साइन्सका अध्यक्ष कश्यप पौडेल, कर्मचारी संघका अध्यक्ष देवदत्त बडूलगायतले प्राविधिक शिक्षाको एउटै मूलद्वार हुनु आवश्यक रहेकामा जोड दिनुभयो । कार्यक्रममा उत्कृष्ट कर्मचारी, विद्यार्थी र सेवानिवृत्त कर्मचारीलाई पुरस्कार तथा सम्मान दिइएको थियो ।

प्रकाशित : आइतबार, फागुन १३, २०७४१५:०३

आफ्नो मत ब्यक्त गर्नुहोस् :

अर्को समाचार:

काँग्रेस संसदीय दलको विधान अनुमोदन