“मधेशवादी दल एउटै बन्नुपर्छ”

Leaderboard Banner

लहान, राष्ट्रिय जनता पार्टी नेपालका अध्यक्षमण्डल सदस्य राजकिशोर यादवले प्रतिनिधिसभा र प्रदेशसभा निर्वाचनमा चुनावी गठबन्धन गरेका मधेशवादी दल एउटै बनाएर अघि बढ्नुपर्ने बताउनुभएको छ ।

मधेश आन्दोलनका प्रथम शहीद रमेश महतोको स्मृतिमा आज लहानमा आयोजित ११औँ बलिदानी दिवसका अवसरमा यादवले चुनावका बेला चुनावी तालमेल गरेका राजपा र संघीय समाजवादी फोरम नेपाल अब फरक फरक झण्डामा नभई एउटै झण्डामुनि गोलबद्ध हुनुपर्ने बताउनुभयो । प्रतिनिधिसभामा नवनिर्वाचित सदस्य यादवले अब पनि संविधान संशोधन गर्न ढिलाइ गरिए आफूहरु पुनः आन्दोलन चर्काउन बाध्य हुने चेतावनी दिनुभयो ।

कार्यक्रममा राजपाका सहमहामन्त्री तथा प्रदेशसभामा नवनिर्वाचित सदस्य सुरेशकुमार मण्डलले शहीद दिवस र पृथ्वीजयन्तीमा सरकारले सार्वजनिक बिदा दिए पनि मधेश बलिदानी दिवसमा बिदा नदिएर सरकारले मधेशी शहीदको बलिदानको अवमूल्यन गरेको आरोप लगाउनुभयो । समाजवादी फोरमका नेता राजलाल यादवले अब बन्ने सरकारले मधेशी शहीदप्रति सम्मान हुने गरी ठोस योजना ल्याउनुपर्ने बताउनुभयो ।

यसअघि राजपा अध्यक्षमण्डल सदस्य यादवलगायत राजपा र फोरमका नेता तथा कार्यकर्ताले लहानस्थित शहीद उद्यानमा रहेको शहीद रमेश महतोलगायत शहीदको शालिकमा माल्यार्पण गर्नुभएको थियो । त्यस्तै सो अवसरमा आयोजित रक्तदानमा १०० जनाले रक्तदान गरेका छन् । -रासस

प्रकाशित : शुक्रबार, माघ ०५, २०७४१९:३३

आफ्नो मत ब्यक्त गर्नुहोस् :

अर्को समाचार:

काँग्रेस नेता जोशीलाई पितृशोक,काँग्रेसद्वारा दुःख व्यक्त